E organizuar në 4 dhoma dhe një oborr, BERK është një mikrounivers autentik prej të cilit kushdo del duke marrë me vete veç tjerash edhe një vetëdijësim të mirë mbi trashëgiminë e madhe materiale e jomateriale të traditës tiranase. Shtëpia e qerpiçit u organizua fillimisht sipas modelit tip të banesës mesdhetare me oborr, kuzhinën verore, çardakun dhe hyrjen tipike tiranase me dy këmbë shkallë për te dhomat e banuara. Me kalimin e kohës ata që e banuan e përshtatën banesën e tyre në përputhje me nevojat e përditshme, përshtatje të cilat shpesh u realizuan mirëfilli me punë dore në mënyrë krejt origjinale. Elemente tipizuese të traditës tiranase (si pusi i ndarë përgjysmë me komshiun) mund të qëmtohen nga gjithë ata që duan ta shfrytëzojnë këtë hapësire pune dhe frymëzimi. Ditëve me diell ky ishull i vogël në të ashtuquajturën “Mëhallë e Re” fal kredhjen në qetësinë e plotë të një realiteti tiranas tashmë thuajse në zhdukje. Afërmendsh e bukura është në sytë e kujt e sheh.

E përbërë nga mjedise krejt intime të krijuara posaçërisht për shoqërizim, BERK co-working space ofron hapësirë për rreth dymbëdhjetë persona. E hapur vijueshëm 10 orë në ditë, ajo ofron gjithçka ju duhet për t’u përqendruar në disa orë pune të frytshme në një mjedis që ju frymëzon.

Suporte shtesë përfshijnë koneksion wi-fi, një bibliotekë me tituj themelorë nga lëmi i filologjisë, albanologjisë, historisë, artit e arkitekturës, të cilat mund t’ju ndihmojnë në studimet apo punën tuaj. Gjithaq ofrojmë dhe infrastukturë për të zhvilluar mbledhje apo prezantime, si edhe kafe, çaj e kësodore.

BERK mer përsipër të përzgjedhë për tregun e lexuesve tanë një listë të kujdesshme të titujve shqiptarë dhe të huaj, përmes shestimit që synon cilësinë. Çka garantojmë ne është shitja në librari e mjaft titujve të rëndësishëm në historinë e zhvillimit të mendimit dhe kritikës, pavarësisht vitit të botimit apo gjuhës së tekstit. Libraria është një hapësirë shumëgjuhëshe.