“Supa Miso” nga japonezi Ryu Murakami është rrëfimi i dy netëve në rrugët e lagjes rozë të Tokios. Përmes dinamikave që rimarrin nga estetika manga e lëvizjes dhe elementit të fortë erotik të traditës shunga, “Supa Miso” është dhe një rrëfim i Japonisë konsumiste, të mbyllur dhe i rinisë së saj me sytë nga Perëndimi. Çmimi “Akutagawa”, një nga çmimet letrare më prestigjioze të Japonisë, e çimentoi reputacionin e Ryu Murakamit në vendin e tij, si mjeshtër i letërsisë së errët dhe të dhunshme. Murakami ka prodhuar vepra që synojnë të depërtojnë në rrënjët e një kombi gjithnjë e më të përçarë, përmes shqyrtimit të anëtarëve të tij më të poshtëruar, të dhunshëm dhe të dëbuar nga shoqëria.
